各位親愛嘅讀者，我知道大家辛苦，本身最喜歡聖誕節嘅我，都十分明白唔可以出街玩係會有失落，但請各位乖乖哋，留喺屋企，減少社交接觸。
我亦會好好保護自己，同時緊守拍攝崗位，盡我所能將適合喺屋企做、可以一家人玩吓開心吓嘅食譜無私咁教大家，好似呢個無薑餅人，不妨同小朋友一齊製作🥰
對於接二連三嘅疫情，對我嘅教室亦有很大嘅打擊，對於第一次白手經營嘅我，真係感到好無力亦好無助，每日都有唞唔到氣、同時亦好似做咩決定都錯嘅感覺，好憤怒、好擔心、好驚、好緊張。但難過我都要過，無助都要幫自己，緊守工作崗位，盡力維持員工收入，盡綿力將節目帶畀大家，為自己為人做到幾多就幾多。希望各位都出一分力，每位香港人出一分力，攜手對抗疫情。
我嘅信念强大地深信，我嘅讀者一定身體健康，喺呢個時間，我呼籲你哋，乖乖哋，同埋幫助身邊有需要嘅人，一齊完成「過咗個冬天」呢個最近嘅目標。
冬至快樂！
Search